臨睡前留一盞燈

以前如果你出trip嘅話，我夜晚都會瞓唔著，一定要開燈，因為我怕黑；你亦曾經講過，如果我出trip嘅話，你都會瞓唔著，都開盞燈，因為你都怕黑！

但你走咗之後，一個人住喺呢間屋裏面，我冇再開燈喇，我都唔知點解？！有時聽到啲怪聲，我都會驚一驚，但好快又無嘢喇，我唔知點解我會變得咁大膽！

其實係咪因為你一直都喺我身邊，默默咁守護著我呀？多謝你呀！你放心走喇！我已經唔洗再驚啦，因為你唔會再出trip喇，你永遠都會响在我心裏面，雖然我再唔能夠摸到你、感受到你嘅體溫！更加唔可以再攬住你、錫你！

只要你响另一個世界裡面，開開心心、快快樂樂、無憂無慮……咁就已經足夠喇！

留不底 離不開

我真係掛住你，好多個夜晚都瞓唔著，日日都喊，真係好想叫你返來我身邊，但我知道，咁對你唔係太好，好想你快啲成佛成仙 ，唔好再記住我，等有朝一日，你真係成為大麻鷹神仙嘅話，先至嚟搵我喇，好嗎？

唔好再擔心我啦，我會好好咁照顧自己，雖然我仍然會喊，但係 呢個只不過係我一時情緒發作啫！好快我就可以平復返㗎喇！你信我呀，你對我實在太好喇，我唔想再累你，所以你唔好再理我喇，做番你自己應做嘅嘢啦！成為大麻鷹神仙呀！

愛你！愛你！永遠都咁愛你！！